|
موغان - گئرمی ، فولکلور دوشرگهسی فولکلور، خالق یارادیجیلیغی، کولتور، میتولوژی، مدنیت (عکس: اسماعیل شهباززاده)
| ||
|
آت ساخلاماقلا باغلی فولکلور ماتریالاری توپلاماق اوچون سورولان اؤرنک سورولار. (فولکلورون هر قونوسونا گؤره بو کیمی سورولار خاضیرلاییب، بیلنرلردن سوروشماق اولار.)  1- آت نئچه ایل عؤمر ائدیر؟ 2- بو مدتده هانسی زامانینا قوجا دئییلیر؟ 3- نئچه یاشدا بالا دوغار؟ 4- بوغازلیق دؤرو نئچه آی چکیر؟ 5- جوتلشمک ایستهیینی نئجه بیلدیریر؟ 6- جوتلشمک ایستهدییی حالینا نه دئییلیر؟ 7- هر دؤنه دوغاندا نئچه بالا دوغار؟ 8- بالا نه مودت سوت امر؟ 9- ایلک یئمهیه باشلایاندا هانسی یئملر یئیر؟ 10- آتین بالاسی اولاندان بؤیویوب آت اولوب قوجالانا کیمی نه آدلار آلیر؟ 11- آتین اصیل یئمی نهدیر؟ 12- اصیل یئمیندن باشقا هانسی یئملر وئریلیر؟ 13- بو یئملر اصیل یئمه نسبت آتدا نه تأثیر قویور؟ 14- گونده نئچه دؤنه یئم وئریلر؟ 15- نئچه واختدان بیر سو ایچیر؟ 16- آتین ساخلاندیغی یئرین مخصوص آدی وارمی؟ 17- آتین سوتوندن، اتیندن، دریسیندن، یئلکهسیندن و ... استفاده اولونور یا اولونارمیش؟ 18- تورکه داوا اوچون آتدان بیر استفاده اولوناردی؟ 19- آتا گؤز دیمهسین یا باشقا بیر ضرر گلمهسین اونون اوزریندن نهسه آسارلار؟ 20- آتین یئلکهسینی و قویروغونو وورارلارمی؟ 21- آتین یئلکهسینین یا قویروغونون وورولماسینین یا کسیلمهسینین بیر معناسی وارمی؟ْ 22- هارالار و هانسی آب-هاوا آت اوچون یاخشیدیر؟ 23- آتی ایستی یا سویوقدان قورماق لازیمدیرسا نه ایشلر گؤررلر؟ 24- آتین یاشینی نئجه بیلمک اولور؟ 25- نئچه نوع آت واریمیزدیر، آدلاری نهدیر؟ 26- آتین رنگلری نهلردیر؟ 27- آتین اعضالارینین آدی نهلردیر؟ 28- هانسی رنگی چوخ سئویلیر؟ نییه؟ 29- آتین ساخلاندیغی قاپییا و ییهسینه مناسبتی نئجه اولور؟ 30- آیری قاپی و اؤزگه آداما قالدیغی یئرله بیر فرق قویورمو؟ 31- آت اؤز همنوعینی (ارکک یا دیشی) گؤرنده نهلر ائدیر، نه حرکتلر گؤستریر؟ 32- آت اونو اینجیدن آدام یا حیوانلار ایله نئجه رفتار ائدیر؟ 33- آتین ناخوشلوقلاری نهلردیر؟ 34- بو ناخوشلوقلار نئجه درمان اولور؟ 35- بو حیوانی هانسی اذیتجیل حیوانلار، بؤجکلر و یا انگللر تهلوکهیه سالیر و یا اینجیدیر؟ 36- آتین دوشمنی وارمی؟ 37- آتین روحی خصوصیتلری نهلردیر؟ 38- هانسی آت مینیک اوچون یاخشی و اویغوندور؟ 39- مینیک آتینین انواعسی وارمی؟ 40- یاخشی بیلدییین آتین خصوصیتلری نهلردیر؟ 41- یوک آتینین خصوصیتلری نهلردیر؟ 42- آت بیر گونده نه قدر یول گئدهبیلر؟ 43- اوزاق یول گئدنده نه مسافه یا نه مودتدن بیر دایانماق و استراحت و یئم-سو لازیم اولور؟ 44- آت نئچه یاشیندا مینیک یا یوک اوچون استفاده اولونار؟ 45- آتی تمیز ساخلاماق اوچون نهلر ائتمک لازیمدیر؟ 46- آتین گوج و قودرتینه گؤره نه دئیهبیلرسن؟ 47- بیریم طرفلرده آتا آد قویارلارمی؟ 48- آتین دوشر-دوشمزی اولورمو؟ 49- قدیملردن آتا گؤره نه بیلیرسن؟ 50- آت حاققیندا آتالاریمیز نه دئییبلر؟ 51- آت اینسانی خطردن قورتارماغا گؤره باشا گلدی، حکایه یا ناغیل وارمی؟ 52- قدیمکیلردن بوینوزلو، قانادلی و یا عجایب گؤرکمی اولان آتا گؤره نهسه ائشیدمیسن؟ 53- آتا نه اوچون نال وورولور؟ 54- نال نه زاماندان وورولور؟ 55- نالی نه اوچون بعضاً حیوانلارین آلنیندان آسیرلار؟ 56- نالی نه آوچون بوزباشا آتارمیشلار؟ 57- نالین بو کیمی آیری بیر استفادهسی وارمی؟ 58- آتی مینمک اوچون باشینا وورولان و بئلینه قویولانین آدی و اونون اجزالارینین آدلاری نهلردیر؟ 59- اونلارین جینسی نهدن اولور؟ 60- آتا گؤره سورمادیغیم نه قالدیسا، او حاقدا بیلدییینیزی دئیین.
[ چهارشنبه چهارم دی ۱۳۹۲ ] [ 22:5 ] [ آیدین (علی محمد) خلفی زنگیر ]
فولکلورون اؤزللیکلری (خصوصیّتلری) 1. شفاهی اولما /oral, vorbal/ اؤزللیگی: فولکلورون ايچينده اولان بوتون عنصرلار، شخصدن شخصه «شفاهی ارتباط» شرایطینده کئچیر و ائلهجه نسیلدن نسيله انتقال تاپیر. بونا عادتلر، مراسیملر، تقلید و نمایشلر، دانسلار، دراماتيک اويونلار، ساز چالماق، ماهنی اوخوماق، حئکايه دئمک، ائو تیکمک، داوالار و تداوي اوصوللاری، يئیهجکلر، گئیهجکلر و ائل صنعتلري داخيلدير. 2. سنّته باغليليق /tradition/ اؤزللیگی: فولکلور محصوللارینین هر نؤوعو بير سنّته باغليدير. سنّتلر، فولکلور محصوللارینین معین بير «فورم» قازانماسيني و بو «فورم» ايچينده اؤزونو داوام ائتديرمهسيني ساغلار، آيريجا اونلارا اؤزلرینی معین ائدن باشقا فرقلی اؤزللیکلری قازانديرار. بير يئرده بير اينسان اجتماعسی وارسا يعني عضولر عيني ديلي، شرایطی و تاريخي پايلاشيرلارسا اورادا سنّتلر واردير. بير محصولون فولکلور محصولو اولاراق قبول ائدیلمهسي اوچون «شفاهی اولما و سنّته باغليليق» اؤزلليکلرینه صاحیب اولماسي لازيمدير؛ آما نه هر شفاهی شئي نه ده هر سنّت فولکلور دئیيلدير. هر ايکي اؤزللیگین ده بير یئرده اولماسي لازیم ساییلیر. 3. تنوع /variant/ اؤزللیگی: فولکلور محصوللارینین داغيلماسي، ياييلماسي شفاهی کئچيش و يا شفاهی ارتباط ايله اولور. مشترک محیطده یاشایانلارين قابلیّتلری، دوروملاري، تجروبهلری ايجرا ائديلن بير فولکلور محصولونون فرقلي شکیللرده تکرار ائدیلمهسينه يول آچیر. اسکي فورم و محتوادان فرقليليک گؤستَرن يئني محصولا «واريانت» دئییلمکدهدير. واريانتلارين سايي نامعلومدور. 4. آنونیملیک /anonymous/ اؤزللیگی: فولکلور محصوللارینین ايلک ياراديجيلارينين اونودولموش اولدوغونو ايفاده ائتمک اوچون استفاده اولونان بو اصطلاح، اونلارين اينسانلار طرفيندن دائما بيرليکده ياراديلديغي معناسینی وئرمیر. هر بير محصولون بير ايلک ياراديجيسي واردير؛ آما شفاهی ایفاده سنّتی بونلاري عمومیّتده محافظه ائدهبیلمهميشدير. شفاهی گئچيشلرده هر محصول، راستگلديیي، يا دا اولدوغو «شفاهی قرارداد»لاريندان کؤکونده، فورمونا، کارکردینه، محتواسينا بير شئيلر قاتميش و يا چيخارميش اولاراق ياشاییر. 5. قاليبلشمه /formularization/ اؤزللیگی: فولکلور محصوللاری، نؤولرینه، سنّتلرینه اويغون شکیلده قاليبلر، ایفاده و يا ترکیب عضولری ياراديرلار. قایناق: http://www.bilgicix.com/2011/05/folklorun-ozellikleri/#comment
[ سه شنبه سوم دی ۱۳۹۲ ] [ 0:6 ] [ آیدین (علی محمد) خلفی زنگیر ]
|
وئبلاغا گؤره  بو وئبلاق موغان بؤلگهسینده اولان کند و شهرلرله ایلگیلی فولکلور، میتولوژی و مدنیّت حاقدا آراشدیرما آپاریر. بو قوللوقدا باشاری قازانماق بیلیملی و ماراقلی اینسانلارین یاردیمی اولمادان چوخ چتیندیر. اونا گؤره یاردیم دیلهمکدن ده گئری قالمیریق. یازیلان فولکلور نمونهلری، اینانجلار، میتولوژیک دوشونجه آچیقلامالاری و.س ایله اوغراشماق هئچ ده بوتون بونلارا اینانماق معناسینا گلیب چیخمیر. اجدادیمیزین دوشونجه و یاشام طرزینی اؤزونده ساخلایان و اوزون مودّت عرضینده نئچه نسلین تصوّر و دوشونجهسیندن سوزولوب گلن بو ماتریاللار، اینانماغا یوخ مطالعه ائدیب اؤیرنمک و درس آلماق اوچون اؤنملیدیر. بوتون بونلاری یئر آلتیندا اولان آرخئولوژی اشیالاری کیمی مطالعه ائدیب بیر میلّتین کولتور، مدنیّت، یاشام طرزی و معنویاتینی اؤیرنمک اولار. آرخئولوژی اشیالارینی اوغرولار چالدیغی کیمی، بو ماتریاللاری داشییان یاشلیلاریمیزی دا اَجَل ووردوقجا، گونو-گوندن بو حاقدا مطالعه اوچون گئرچک قایناق آزالیر. اون اوچون معنوی ثروتیمیزین قایغیسینا قالان هر کیمسه گئج اولمادان ایشه باشلامالیدیر. | |
| [ طراحی : ایران اسکین ] [ Weblog Themes By : iran skin ] | ||