قالب پرشین بلاگ

خالق بیلگی سی (فولکلور, فرهنگ عامه)

خالق بیلگی‌سی بیر دوغوم‌دور؛ بیزلری یاشاما سئوینجی ایله آغلادان.

بئشیکده کی کؤرپه یه لایلا‌دیر؛ آنالاریمیزین اومید و انتظارلاری ایله بزه نن.

بیر ماهنی دیر؛ تورکون عشق و محبتینی، کدر و سئوینجینی دیله گتیرن.

قاف داغی‌نین اویانیندا یاشانمیش حادثه لری آنلادان بیر ناغیل‌دیر؛ کل اوغلانی پری قیزی ایله خوشبختلیگه چاتدیران. بیر دوگون‌دور؛ عاشیق‌لرین خیالارینی حقیقته دؤنده رن.

خالق بیلگی‌سی بیر یاغیش دعاسی‌دیر؛ چاتلامیش توپراغی سویا قاندیران.

بیر صحبت دیر، محبت دیر؛ قیرخ ایل خاطیری ساییلان بیر فنجان تورک قهوه سی ایچمیش کیمی، دادی داماغلاردا قالان.

نصرالدین هوجا‌دان بیر لطیفه دیر؛ غملی بیر آنیمیزدا بئله بیزی گولدورن، گولدورورکن، دوشوندورن.

خالق بیلگی‌سی بیر قالی و یا کیلیم‌دیر؛ هر ایلمه سی، بیر نقاش فیرچاسی کیمی، قوتارمایاجاق ظن ائدیلن رسمی بوتونله ین.

بیر اویون‌دور؛ بیر قهرامان اداسی ایله، بیر کهلیگین اووچونون قاباغیندا سکمه سی کیمی، اوینانان.

هم شعر، هم نغمه‌دیر؛ ایکی‌سی بیرلیکده دیللرده ماهنی یا دؤنوشن، دیلیمیزدن بیر سازین تئلینه یئتیشن.

بیر اوخشامادیر؛ سئودیییمیزی ایتیرمه نین غمی ایله بیزی آغلادان.

بیر چای دیر، آتا‌لاریمیزلا بیرلیکده آخمایا باشلایان و ایندی ده جوشقون آخان.

خالق؛ بو بیلگینی تولید ائدیب، گلیشدیرن و زنگینلشدیرن، بو بیلگی ایله آنلادیب دینله ین و بو بیلگی ایله چالیب اوینایان، بو بیلگی ایله توخویوب ایشله دن ‌دیر.