|
موغان - گئرمی ، فولکلور دوشرگهسی فولکلور، خالق یارادیجیلیغی، کولتور، میتولوژی، مدنیت (عکس: اسماعیل شهباززاده)
| ||
|
قدیم سؤزلر دوغرو دئمیشلر؛ دیل جانلی وارلیقدیر. بو جانلی وارلیغا لازم اولان شرطلری بیلهرکدن یا بیلمزدن پوزاندا، دیل آرتیق پوزولماغا و نهایت اؤلومه دوغرو گئدیر. ارتباط بئله گوجلو و قاچیلماز اولدوغو اوچون دیله دقت یئتیریب قوروماسان بیزیم دیلیمیز (تورک دیلی) کیمی یوخسوللاشیب استفادهدن چیخا بیلر. بو تکجه بیزیم دیله عاید دئییل بلکه هر دیل بو مسأله ایله البهیاخادیر. فرقیمیز بوندادیر؛ دیل صاحبلری اونو اؤلومدن قوروماق اوچون «فرهنگستان» یا «دیل قورومو» آدلانان بیر یئر یارادیبلار و دیلین سؤز داغارجیغینا گیریب- چیخان کلمهلره نظارت ائدیرلر. (بیز هله ده محروموق) بیزیم دیلین سؤز داغارجیغی وارلی و زنگین اولسا دا، علمین، صنعتین و حیاتین سرعتلی گلیشیب دییشمهسی یئنی- یئنی کلمهلر گتیریر و اونا تای و قارشیلیقلی سؤزوموز و «فرهنگستانیمیز» اولمادیغی اوچون دیلیمیز گونو- گوندن قیسیرلاشیر. بئله کی؛ ایستهییمیزی افاده ائتمهیه یئتمیر. بو دا دیلیمیزین ایشدن دوشمهسی و بالا-بالا اؤلمهسی دئمکدیر. ایندی فرهنگستان بو ایشی گؤرورسه، بوندان قاباق یارانان کلمهلری هانسی قوروم و تشکیلات یارادیبدیر؟ انسانلار بیر یئره ییغیلمادان، فیکیرلشمهدن، بیر قرارا گلمهدن سسسیز- سمیرسیز بو کلمهلر نئجه یارانمیشدیر؟ ... اونا گؤرهدیر کی اوجا تانری بویورور: وَمِنْ آيَاتِهِ خَلْقُ السَّمَوَاتِ وَالأَرْضِ وَاخْتِلافُ أَلْسِنَتِكُمْ وَأَلْوَانِكُمْ إِنَّ فِي ذَلِكَ لآيَاتٍ لِّلْعَالِمِينَ (الروم:22) دونیا انسانلاری (حتی کافیر دئییب بینمهدیییمیزلر) دیلین اهمیتینی بیزدن یاخشی بیلیب و اونونلا مشغول اولوبلار، و اونو عزیزلهییب آنماق اوچون ایلین بیر گونونو (اسفندین ایکیسینی) اونا آییریب و «دونیالیق آنا دیلی گونو= روز جهانی زبان مادری» آدینی قویموشلار. عجبا بیزیم دینی کتابیمیز «قرآن» بئله اونو آللهین آیت و نشانهسی کیمی یازارکن بیزلر نییه اونا اهمیت وئرمیریک؟؟! یقین کی عالم دئییلیک.! چون قرآن بویورموش؛ إِنَّ فِي ذَلِكَ لآيَاتٍ لِّلْعَالِمِينَ ...... دیلیمیزده اولان بیر نئچه قدیم سؤز: *آربا: برابر، ائشیت. (اؤزل اولاراق بوغدا و بو کیمی تاخیلی اولچن قابا دا دئییلیر.) *آوارماق: تشخیص وئرمک. (یئل دییردی نه دئدیگینی آوارمادیم. گؤزوم سئچمهدی، کیم اولدوغونو آوارمادیم.) *بادانمیش: نهیهسه ایلیشدیگیندن- گرفتار اولدوغوندان بیر یئردن آیریلا بیلمهین. اصیل آنلامی ایسه برک-برک باغلانمیشا دئییلیر. *باسالاغ: محدوده، قاپسام.
[ یکشنبه پنجم بهمن ۱۳۹۳ ] [ 20:36 ] [ آیدین (علی محمد) خلفی زنگیر ]
|
وئبلاغا گؤره  بو وئبلاق موغان بؤلگهسینده اولان کند و شهرلرله ایلگیلی فولکلور، میتولوژی و مدنیّت حاقدا آراشدیرما آپاریر. بو قوللوقدا باشاری قازانماق بیلیملی و ماراقلی اینسانلارین یاردیمی اولمادان چوخ چتیندیر. اونا گؤره یاردیم دیلهمکدن ده گئری قالمیریق. یازیلان فولکلور نمونهلری، اینانجلار، میتولوژیک دوشونجه آچیقلامالاری و.س ایله اوغراشماق هئچ ده بوتون بونلارا اینانماق معناسینا گلیب چیخمیر. اجدادیمیزین دوشونجه و یاشام طرزینی اؤزونده ساخلایان و اوزون مودّت عرضینده نئچه نسلین تصوّر و دوشونجهسیندن سوزولوب گلن بو ماتریاللار، اینانماغا یوخ مطالعه ائدیب اؤیرنمک و درس آلماق اوچون اؤنملیدیر. بوتون بونلاری یئر آلتیندا اولان آرخئولوژی اشیالاری کیمی مطالعه ائدیب بیر میلّتین کولتور، مدنیّت، یاشام طرزی و معنویاتینی اؤیرنمک اولار. آرخئولوژی اشیالارینی اوغرولار چالدیغی کیمی، بو ماتریاللاری داشییان یاشلیلاریمیزی دا اَجَل ووردوقجا، گونو-گوندن بو حاقدا مطالعه اوچون گئرچک قایناق آزالیر. اون اوچون معنوی ثروتیمیزین قایغیسینا قالان هر کیمسه گئج اولمادان ایشه باشلامالیدیر. | |
| [ طراحی : ایران اسکین ] [ Weblog Themes By : iran skin ] | ||