|
موغان - گئرمی ، فولکلور دوشرگهسی فولکلور، خالق یارادیجیلیغی، کولتور، میتولوژی، مدنیت (عکس: اسماعیل شهباززاده)
| ||
|
قارداشلار ساواشدی اَبلاهلار ایناندی قدیم زامان بیر کندده بیر بی قولدورلوق ائدیرمیش، کند اهلی اونا بویون اَیسه ده ایکی قارداش وار ایمیش کی اونا بویون اَیمیرمیش، گوجلو و ایگید اولدوقلاری اوچون ده بی و آداملاری اونلارا باتیشا بیلمیرمیش. بی اونلاری بیر- بیریندن آییریب، ضعیفلدیب و سونوندا قول ائتمک اوچون مختلف حیلهلر ایشلدیردی. بیین دیللی باشلی آداملاری قارداشلاری آیری آیری گؤروب او بیریسین پیسلهییردیلر تا بلکه اونلارین آراسیندا محبت، قارداشلیق و بیرلیک یئرینه نفرت و دشمنلیک حاکم اولا. بیر گون کیچیک قارداش او بیریسینه دئییر؛ بَی بو قدر بیزی آییرماغا زحمت چکیر گؤرهسن نه فیکیری وار، گل بو بهانهلرین بیرینده اوزده ساواشاق گؤرک نه اولاجاق. و ائله ده ائدیرلر. بی بو حادثهدن سونرا اونلاری تماماً قول ائتمک اوچون باشیندا ایکی- اوچ یانچیسی ایله کیچیک قارداشین قاپیسینا گئدیب دئییر؛ سنین کئچیلرین منیم زمیمی یئییب، اکدیگین تاخیلین یاریسی منیم اولاجاق یوخسا زورلا هامیسینی آلیب سنی کنددن قووارام. کیچیک قارداش بَیین اوزونه آغاریر، بی قامچینی قالدیریب اونون باشینا چالاندا آرخادان بر گوجلو ال اونون بیلنگیندن یاپیشیب سیخیر. بَیین الی بوشالیر و قامچی یئره دوشور. بَی گؤرور بؤیوک قارداش ... بی دئییر؛ به سیز ساواشمیشدیز ! بؤیوک قارداش دئییر؛ قارداشلار ساواشدی اَبلاهلار ایناندی. بؤیوک قارداشین بو سؤزو ایندی ده آتا سؤزو کیمی ائل آراسیندا ایشلَنیر.
[ شنبه هفدهم مرداد ۱۳۹۴ ] [ 16:49 ] [ آیدین (علی محمد) خلفی زنگیر ]
|
وئبلاغا گؤره  بو وئبلاق موغان بؤلگهسینده اولان کند و شهرلرله ایلگیلی فولکلور، میتولوژی و مدنیّت حاقدا آراشدیرما آپاریر. بو قوللوقدا باشاری قازانماق بیلیملی و ماراقلی اینسانلارین یاردیمی اولمادان چوخ چتیندیر. اونا گؤره یاردیم دیلهمکدن ده گئری قالمیریق. یازیلان فولکلور نمونهلری، اینانجلار، میتولوژیک دوشونجه آچیقلامالاری و.س ایله اوغراشماق هئچ ده بوتون بونلارا اینانماق معناسینا گلیب چیخمیر. اجدادیمیزین دوشونجه و یاشام طرزینی اؤزونده ساخلایان و اوزون مودّت عرضینده نئچه نسلین تصوّر و دوشونجهسیندن سوزولوب گلن بو ماتریاللار، اینانماغا یوخ مطالعه ائدیب اؤیرنمک و درس آلماق اوچون اؤنملیدیر. بوتون بونلاری یئر آلتیندا اولان آرخئولوژی اشیالاری کیمی مطالعه ائدیب بیر میلّتین کولتور، مدنیّت، یاشام طرزی و معنویاتینی اؤیرنمک اولار. آرخئولوژی اشیالارینی اوغرولار چالدیغی کیمی، بو ماتریاللاری داشییان یاشلیلاریمیزی دا اَجَل ووردوقجا، گونو-گوندن بو حاقدا مطالعه اوچون گئرچک قایناق آزالیر. اون اوچون معنوی ثروتیمیزین قایغیسینا قالان هر کیمسه گئج اولمادان ایشه باشلامالیدیر. | |
| [ طراحی : ایران اسکین ] [ Weblog Themes By : iran skin ] | ||