قالب پرشین بلاگ

«اوو»لا بیتن سؤز‌لر

بیزلرده آشاغادا یازدیغیمیز کیمی، «اوو»لا بیتن چوخ سؤز‌لر واردیر. «اوو»و بیر سؤز دوزلدیجی «اک/ پسوند» حساب ائتمک اولار. «اوو» بعضی کلمه‌لره قوشولوب یئنی آد و معنا دوزلدیر. بو پسوند رسمی یازیلاردا معناسیز اولاراق «آب» کیمی یازیلیر.

 بئله سؤز‌لردن بیر نئچه نمونه:

-آلقانوو: (گئرمی‌نین دوغوسوندا، کند آدی.) دره‌ئورد چایی‌نین قیراغیندا میزه‌نوو، دیلقانوو، زیغانوو آدلی کندلر واردیر.

-آلپوو: تکاور

-بوخوو: آتین قیچینی باغلاماق اوچون ایستیفاده اولان اؤزل باغ.

-بوزوو: اینگین یئنی دوغولموش بالاسینا دئییلیر.

-بیجه‌لوو/ بیجوو: زیرنگ و هر شئی‌دن باش چیخاران اوشاق.

-بولؤو: بیر جور داش‌دیر کی، اونونلا کسرلری ایتیل‌دیرلر

-جیلوو: آتی یؤنلتمک اوچون اونون یوگه‌نینه باغلانان گؤن قاییش.

-چالپوو/ آلاچالپوو: بایرام آییندا قار و دلو ایله قاریشیق یاغان یاغیش.

-چالوو: دوکان‌لاردا، دییرمان‌لاردا و بئله-بئله یئرلرده، دن-دوش گؤتورمک دن اؤتورو اؤزل قاب.

-چاپوو: غارت، تاراج. چاپووولچو: غارتگر.

-چیلوو: چیله‌مک فعلیندن، ایسلاتماق، سوزمه فورموندا بیشیریلمیش دوگو.

-داغلوو: حیوان‌لاری داغلاماق اوچون ایشله‌نن دمیر.

-دلی‌سوو: دلی اولمایان بیر کیمسه بیراز دلی کیمی داورانان اولسا دئییرلر دلیسوو‌دور.

-دمروو: آدامین دری‌سینه دوشن بیر آلا‌دیر. دمروو دوشن یئر، دری‌ده آغ گؤرونر و قابیق وئریر.

-دوو : بیر آدامی بیر ایشی گؤرمه‌یه اورَکلن‌دیرمک. او ایشی، اورک وئرن آدام یا اؤز خئیرینه یا بیری‌نین آجیغینا گؤردورمک ایسته‌ییر. ایش گؤرن ده بونو بیلمیر.

-انوو: دالاق شیشمه خسته‌لیگی. قاپی‌نین آلت و اوست یانینا قوشولان آغاج‌لار.

-گیجوو: سیفت اولا‌راق گیجه اوخشار.

-هوو/هاو: یارانین اویان-بویانی قیزاریب ورم ائدنده، «هوو»لاییب دئییرلر.

-خینوو: همیشه اودوزان آدام.

-کالوو: تیکینتی‌لرین اوچموش دورومو، بئله کی دؤوره دووارلاری‌نین بیر آزی آیاق اوستده اولا.

-کؤسؤو: کؤزؤو، بیر باشی کؤز اولدوق‌دان سونرا سؤنوب قارا قالان اودون.

-قاروو: گؤزو گئجه گؤرمه‌ین آدام، گئجه کورو.

-قانوو: بولاشیق‌لی سویون آخماسیندان اؤتورو دوزلدیلمیش اؤزل آرخ. حجه‌مت‌ده قان آلماق اوچون ایشله‌نن نئشتر.

-قاشوو: آتی تومارلاماغا گرکن دمیر داراق.

-قیلوو: کسیجی آلت‌لرین ایتیلمه‌سین‌دن یارانان ریز دیگیرلر. بیچاغین و قیلینجین ایتیلتمه ایشی (ایبراهیم ساوالان)

-قیروو : یئرین شئهی قیشین سویوق هاوا‌لاریندا بوز ووروب قیر کیمی یئره یاخیلیر، اونا قیروو دئییلیر.

-قوو: آغاج‌لارین دیبیندن بیر جورا گؤبه‌لک بیتر کی، اونلاری دریب، قورودوب سونرا اوووب پیله کیمی یوموشاق ائدردیلر. سونرا، چاخماق داشین بیر-بیرینه چاخاندا، اونو یاخینا آپاراردیلار و چاخماق‌دان آتیلان چینقی‌دان اود قاپاردی. بئله‌لیکله اود یاندیراردیلار.

-میرروو: پیشیگین کورسک چاغی.

-میروو: گئرمی‌نین موران بؤلگه‌سینده داغ آدی.

-میشوو: بیر سیرا داغ‌لارین آدی دیر.

-مینقوو: بورنوندا دانیشان آدام.

-موزؤو: مال قارایا یاپیشان بیر نؤو اوچان بؤجک.

-اوغلوو: ناز و نعمت ایچینده یاشایان.

-اوخلوو: لاواش یایاندا یا ساج چؤره‌یی بیشیرنده اوخلوولا کونده‌نی یاییرلار. اوخا اوخشار نازیک بیر آغاج‌دیر.

-پولوو/ پیلوو: اریشته یا دوگونو بیشیریب دمه قویاندان سونرا پولوو دوزلیر. کیزمه، کته، دم‌ده بیشیریلمیش. پیله‌مک فعلیندن.

-ساخلوو: پادگان، عسکرلرین و دؤیوش‌چو قوه‌لرین توپ‌لو شکیلده قالدیق‌لاری یئر.

-ساققوو: هاوا قورو و چوخ شاختا اولاندا، ساققوو هاوا‌دیر دئییلیر.

-شاخلوو: گونون ان ایستی چاغی.

-شپوو: لبه‌داری بؤرکونه بورا‌لاردا شپوو دا دئییلیر.

-شکروو: گئرمی‌نین قوزئیینده، گئرمی-موغان یولونون آغزیندا کند آدی.

-شیرتوو: پالتاری همیشه بولاشیق اولان اوشاق.

-تیلوو: بالیق توتما قارماغی، توک‌لری گئتمیش دری.

-تیموو/ توموو: زوکام، سویوق دیمه.

-یانوو: قاپی‌نین یان‌لارینا قوشولان ایکی آغاجا دئییلیر.

-زینقیروو: زنگ، سیرا دوزولموش خیردا در-دمیر کی حرکت ائدنده بیر-بیرینه دگیب سس چیخاریر.

*بعضی کلمه‌لر ابراهیم ساوالانین یازیسیندان آلینیب.