|
موغان - گئرمی ، فولکلور دوشرگهسی فولکلور، خالق یارادیجیلیغی، کولتور، میتولوژی، مدنیت (عکس: اسماعیل شهباززاده)
| ||
|
بیر آتا سؤزو: «اوروغوم اولسون، اورومدا اولسون»
بو آتا سؤزو، ایستر «اوروق» سؤزونده و ایسترسه ده «اوروم» سؤزونده درین بیر کئچمیش و تاریخ ساخلاییر. بیزده «اوروق- توروق» کیمی بیر قوشا سؤز وار. کیمیسه کؤتوک نظرده توتوب او شخصدن تؤرهنن نسله «اوروق-توروق» دئییلیر. محمود کاشغرینین دیوانالغاتالتورک* کتابیندا «اوروغ» توخوم و دنه آنلامیندا گلمیشدیر. همان یئرده «اوروق-توروغ»و «هیسیم» - سببی و نسبی فامیللر، دَده وننهلری بیر اولانلاردان هر بیری- کیمی معنا ائتمیشدیر. «اوروم» سؤزو ایندی ده چوخ اوزاقلیغی افاده ائدن بیر کلمهدیر. نهاینسه چوخ داغینیق وضعیتده اولماسینی «اورومنان شاما داغیلیب» کیمی دئییمله افاده ائدیرلر. منجه «اوروم» سؤزو قدیم «روم» امپراتورلوغونو نظرده توتور. یعنی ائلیم-تایفام اولسون، نه قدر اوزاقدا دا اولسا عیبی یوخدور. بو قیسا آچیقلامادان استفاده ائدیب دئمک اولار کی؛ دیلیمیزده هله ده یاشایان بو ایکی کلمه- دیوانالغاتالتورک کتابینین یازییا آلینما تاریخینی نظرده آلساق- مین ایله یاخین عؤمرو واردیر. آتالار سؤزو وارلیغیمیزین چکیردهییدیر دئسک یانیلماریق. [ پنجشنبه یکم بهمن ۱۳۹۴ ] [ 18:34 ] [ آیدین (علی محمد) خلفی زنگیر ]
|
وئبلاغا گؤره  بو وئبلاق موغان بؤلگهسینده اولان کند و شهرلرله ایلگیلی فولکلور، میتولوژی و مدنیّت حاقدا آراشدیرما آپاریر. بو قوللوقدا باشاری قازانماق بیلیملی و ماراقلی اینسانلارین یاردیمی اولمادان چوخ چتیندیر. اونا گؤره یاردیم دیلهمکدن ده گئری قالمیریق. یازیلان فولکلور نمونهلری، اینانجلار، میتولوژیک دوشونجه آچیقلامالاری و.س ایله اوغراشماق هئچ ده بوتون بونلارا اینانماق معناسینا گلیب چیخمیر. اجدادیمیزین دوشونجه و یاشام طرزینی اؤزونده ساخلایان و اوزون مودّت عرضینده نئچه نسلین تصوّر و دوشونجهسیندن سوزولوب گلن بو ماتریاللار، اینانماغا یوخ مطالعه ائدیب اؤیرنمک و درس آلماق اوچون اؤنملیدیر. بوتون بونلاری یئر آلتیندا اولان آرخئولوژی اشیالاری کیمی مطالعه ائدیب بیر میلّتین کولتور، مدنیّت، یاشام طرزی و معنویاتینی اؤیرنمک اولار. آرخئولوژی اشیالارینی اوغرولار چالدیغی کیمی، بو ماتریاللاری داشییان یاشلیلاریمیزی دا اَجَل ووردوقجا، گونو-گوندن بو حاقدا مطالعه اوچون گئرچک قایناق آزالیر. اون اوچون معنوی ثروتیمیزین قایغیسینا قالان هر کیمسه گئج اولمادان ایشه باشلامالیدیر. | |
| [ طراحی : ایران اسکین ] [ Weblog Themes By : iran skin ] | ||